Luondu ja biras
Les mer

Murren

Bilde
Creative Commons by-nc-sa
Foto: Lars Ove Kvalbein, Kilde: flickr.
Bilde
Creative Commons by-nc-sa
Foto: Lars Ove Kvalbein, Kilde: flickr.

Muorra lea dábálaš boaldámušgálvu. Badjel bealli muorrageavaheamis máilmmis manná boaldámuššii. Muhto muorra adno maid ávnnasin viessohuksemii, viessogálvvuid ja reaidduid dahkamii, báhpira, lihpariid ja ollu eará diŋggaide. Odne lea muorra deaŧalaš industriijagálvu.

Jus čuollá vuovddis visot muoraid, de šaddá áibmu goikáseabbo ja de eai riibba dakkár šattut mat gáibidit njuoska áimmu. Olu jeagelšlájat leat hearkkit goike áibmui ja sáhttet áibbas jávkat. Muhtin lottit dárbbašit gálvamuoraid ja stohkiid maidda beasi ráhkadit. Dakkár muorain leat olu divrrit bárkku vuolde ja mat leat biebmun lottiide. Danne lea buorre diktit orrut dakkár muoraid. Lottit mat dárbbašit boares vuovddi leat earret eará čáihnit mat ellet divrriiguin mieska muorain, ja čukča ja goahppil mat gáibidit stuora saji ja liikojit vuovddis gos leat boares, stuora muorat.

Rabas, jalges báikkiid guvlui, nu go jekkiid, jávrriid, duoddara guvlui, berre guođđit vuovddi čuolakeahttá. Go murre, čuollá smávva osiid vuovddis ja seastá vesáid. Vuovdi mii báhcá birra dakkár čuolahagaid várjala biekkaid ja galbmasa vuostá nu ahte muorat šaddet buorebut. Vuovddis gos muorat leat iešguđet agis ja leat olu vesát, sáhttá njeaidit buot boares sogiid ja vel njárbet vesáid jus leat beare olu.

Guovlluin gos lea nu galmmas ahte šattut eai šatta nu jođánit, lea earenomáš dárbbašlaš jurddašit movt murret nu ahte ii billis vuovddi. Lea maid dárbbašlaš muitit leat várrogas dan áiggi go lottit monnejit ja eallit čivget go dalle dat dárbbašit ráfi.

Muorračuohpahagain šaddet muorjjit, rissit ja eará smávva šattut. Doppe gávdnet rievssahat ja njoammilat borramuša seammás go sáhttet čiehkádit rissiid sisa. Skáhpi, duopma ja suhpi leat muorat main lea biebmu sihke lottiide ja elliide. Danne lea buorre dakkáriid seastit go njeaidá muoraid.