2.3 - Monnevuoidasiin dikšut

Monnevuoidasa dahká ná:

• 1 monnefiskadasa
• 1 dl oljju
• 1 deadjabastte dievva sáibbu

Veahážiid mielde seaguha oljju monnái ja fierru čađat. Loahpas lasiha veahá sáibbu. Vuoiddas galgá leat olggosoaidnit dego majonesa. Diet seaguhus doallá sullii viđa čupmii.

Vuoidasa ja čuomaid bidjá plastihkkabussii ja lihkahallá/čárvu. Čuomat galget leat monnevuoidasis unnimusat diimmu. Ferte lihkahallat ja čárvut čuomaid vuoidasis vai vuoiddas manná miehtá čuomaid ja dikšu daid. Jus diktá ija badjel leat vuoidasis, de fertejit leat galbmasis.

Go čuomat lea dikšojuvvon monnevuoidasis de doidá daid galbma sáibočázis ja heŋge goikat.

Go leat goikan oalle muddui, de ruvve čuomaid dassážii go lea goikan ja dipman. Dán dikšunmálle mielde ii sáhte galmmihit čuomaid gaskkohagaid, muhto dikšut daid dassá leat meaidašuvvan oalát.

Dán dikšunvuogi mielde ii dárbbat dađi eanet eará vuoidasiin vuoidat, go monnevuoidasis lea dan mađe vuodja ahte dipmada guollenáhki.