2.4 - Vuoiŋŋamašvuoidasiin dikšut

• 1 dl bohcco vuoiŋŋamaččaid
• 1 dl čázi

Duolddaha sullii 10 min. Vuoiŋŋamaččaid molle ja seaguha bures. Ferte čoaskudit bures ovdal bidjá čuomaid dohko. Seaguhus galgá leat vuollel 20 gráda, muđui boaldá čuomaid!

Diet seaguhus doallá sullii 5-6 čupmii.

Go vuoiddas lea čoskon, de bidjá čuomaid vuoidasii ja lihkahallá ja ruvve bures vuoidasis. Lea dehálaš álggos gieđaidgaskkas lihkahallat ja ruvvet bures vai vuoiddas manná miehtá. Čuomat galget leat dán vuoidasis unnimusat diimmu. Sáhttá bidjat plastihkkabussii idjii galbmasii. Go čuomat leat doarvái dikšojuvvon vuoidasis, de goikadastá veahá, sáhttá njulget fiellu nala. Go leat veahá goikan, ja luoitigoahtán fiellu, de galgá ruvvegoahtit ja dipmadit. Álggos gieđaid siste ja dasto juogaman vuostá ruvvet dassážii leat goikan ja dipman. Go vuoiŋŋamašvuoiddas ii atte ivnni nu go monnevuoiddas, de dan ii dárbbat doidit eret.