3.1 - Čoahkkáigeassu

Čoahkkáigeassu, rávvagat ja eará dieđut.

Eanas guliin sáhttá čuoma meaidit ja atnit juonin.

Sáhttá dikšut juogo osttuin, monnevuoidasiin dahje vuoiŋŋamašvuoidasiin. Sáhttá maid ee. goččain, vuoivasiin, meađđemiiguin, álonsálttiiguin ja gunaiguin dikšut čuomaid.

Čuopma ii gierdda lieggaset go 20 gráda liegga čázis leat. Čuopma buollá ja billahuvvá.

Álo go lea moniin dahje bárkkuin dikšon čuoma, galgá doidit galbma sáibočázis ovdal heŋge goikat.

Meidojuvvon čuoma sáhttá maid ivdnet go vuos lea dikšon válmmasin.

Ruvven ja dipmadeapmi lea losimus muhto dehálaččamus bargu guollečuoma dikšumis ja dasa manná olu áigi.

Guollečuomaid leat atnán sihke lávkkaide, biktasiidda, juolgesuodjin ja čanastahkan, ee. bessodahkan. Goikaduvvon báldánáhki leat maid dolin atnán lásen gođiin ja viesuin. Dat lea čađačuovgi go goiká. Lea maid gullon ahte dolin leat rávdadan gáfe goike guollenáhkiin.

Sibirijás leat ággarasa čuoma atnán nu ahte ii leat dikšojuvvon obanassiige (lea hui buoiddes čuopma) sihke sabetbessodahkan ja leaŋkkain.