ČUOVŽA

Govva
Creative Commons by-nc-sa
Govva: commons.wikipedia.org.

Čuovža lea siseatnan guolli ja lea luossaguollái gullevaš. Čuovža gávdno Davvi-Norggas ja Gaskka-Norggas. Suomas ja Ruoŧas gávdno čuovža, muhto ii nu stuora loguid mielde go Norggas. Eará riikkain maid gávdnojit čuovžalágan guolit, ja dutkit eai leat áibbas ovttaoaivilis leat go dát čuovžžat okta ja seamma guolli, vai leat go iešguđetge guollenálit. Čuovža eallá jávrriin ja jogain, ja šaddá muhtin sajiin oalle stuoris. Čuovža sáhttá šaddat lagabui 10 kg lossat, muhto dávjá goddo čuovža mii lea gaskkal 500 grámma, ja 1 kilo. Čuovža gođđá čakčat ovdal go jávrrit jikŋot, ja bidjala meađđemiid bodnái. Čuovža borra eanas bodnedivrriid ja čuoikkaid, ja danin čuovžžas eai leat makkárge bánit njálmmis.

Čuovža lea álo leamaš dehálaš biebmoguolli Guovdageainnu bealde, gos lávejit suovastuhttit, sáltet ja vuoššat. Čuovža lea ovdalašáigge leamašan hui dehálaš gávppi ektui, go lávejedje lonuhit gálvvuid. Buoremus vuohki oažžut čuovžžaid lea firpmiin dehe nuhtiin. Maŋŋil go jiekŋa boahtá čakčat de lávejit olbmot maiddái juoŋastit. Vuokkain lea váttis oažžut čuovžžaid, danin go čuovžža njálbmi lea hui dimis ja mollána jođánit, muhto sidjiide geat dolgevuokkain bivdet lea čuovža hui bivnnuhis guolli.