HÁVGA

Govva
Creative Commons by-nc-sa
Govva: commons.wikipedia.org.

Hávga gávdno buot skandinávalaš riikkain ja lea máilmmi jođáneamos sáivačáhceguolli. Hávga lea hui bivnnuhis guolli sidjiide geat oggot, dan dihte go hávga lea gievra, ja sáhttá šaddat hui stuoris. Lea dábálaš gullat olbmuid geat leat goddán hávggaid mat deddet badjel 10 kg. Muhtomin vel gullo hávggaid birra mat deddet badjel 15 kg.

Hávga gođđá giđđat. Go giđđat dulvá de hávga ohcala suoidnemohkiid mat leat čáze vuolde, ja luoitá meađđemiid rásiid sisa. Meađđenguolli lea álo guoksaguolli. Guoksaguolli šaddá hárve badjelaš 5 kg. Giđđat lea hui álki firpmiiguin bivdit ja sáhttá oažžut olu hávggaid. Dát áigi lea maid buorre áigi bivdit stávrráin, ovdal go hávga manná čiekŋalassii.

Giđđat go čáhci lea ain galmmas, lea hávga sávri. Dalle lávejit hávggas ráhkadit guollegáhkuid.

Hávga ii leat guohtunguolli muhto borra eará guliid. Muhtomin sáhttá sáhpániid maid borrat. Go ohca biepmu, de govddoda várrogasat suinniid siste. Go fuobmá unnit guoli, de vuodjala hirbmat leahtuin ja dohppe guoli ovdal go njielasta. Hávggas leat hirbmat olu ja bastilis bánit maiguin sáhttá doallat guliid bures gitta. Go leat čolleme dehe gálgame vuokka eret njálmmis de fertet váruhit bániin vai it soardde iežat. Hávgga njálbmi sáhttá ráhkadit stuora hávi jos beassa gáskkestit.

Hávga lea guhká geavahuvvon biebmun sámis, ja dábálaččat leat hávgagáhkut mat ráhkaduvvojit. Buot buoremus lea geavahit hávgga mii lea bivdojuvvon go čáhci lea galmmas. Go čáhci šaddá liekkas, de hávga oažžu rásse- ja bodnesmáhka.