Luondu ja biras

4.3 - Álgovuovdi

Govva
Creative Commons by-nc-sa
Govva: Miika Silfverberg, Kilde: flickr.

Álgovuovdi lea vuovdi mii lea boaris ja ii leat mange láhkái duohtaduvvon. Doppe ii leat mašiinnaiguin vuddjon ja eai muorat čullon.

Álgovuovdi lea beassan šaddat nu movt lea, muorat leat ceaggán dassá go leat gahččan ja nu guohcagan. Dakkár vuovddis leat muorat iešguđet agis ja sturrodagas, smávva vesážiid rájes gitta boares stohkiide, ja dat dahká ahte doppe leat eanet šaddošlájat, divrrit, lottit ja eallit go earalágan báikkiin. Beahci sáhttá šaddat 700 jagi boaris ja guossa badjel 400 jagi, soahki birrasiid 200 jagi, muhto ii leat šat báljo vuovdi mii lea boarraset go 160 jagi.

Álgovuovdi ii leat šat gallesajis. Norggas lea dušše Pasvikas Nuorta-Finnmárkkus vel sieiva álgovuovdi. Muđui gávdnojit muhtin báikkiin ráfáidahtton álgovuovdereserváhtat ja eará vuovdešlájat mat leat ráfáidahtton. Lea ain unnán vuovdi mii lea ráfáidahtton go ii leat seamma oaivil ealáhusas ja birasgáhttenberoštumiin.