Luondu ja biras

4.4 - Tropalaš arvevuovdi

Govva
Creative Commons by-nc-sa
Govva: Cristóbal Alvarado Minic, Kilde: flickr.

Tropalaš arvevuovdi lea boarráseamos ekosystema máilmmis. Dakkár vuovdi lea ekváhtora bokte. Arvevuovddit leat earenoamážat máŋgga dáfus. Muorat ja šattut šaddet gerddiid mielde dego livčče máŋga vuovddi badjálaga.

  • Bajemus geardi ollá gaskkal 25-30 mehtera áibmui. Muorrageažit leat suohkadat ja gokčet obba vuovddi nu ahte beaivečuovga ii báljo beasa eatnama rádjái. Dát geardi oažžu eanemus beaivečuovgga ja arvvi, ja eanas fotosyntesa ja lieđđun dáhpáhuvvá bajemus gearddis.
  • Gaskageardi ollá gaskkal 10-25 mehtera áibmui. Šattut dán gearddis eai gáibit nu olu čuovgga. Temperatuvra ja lávttadat lea dássedeabbo go bajimusas.
  • Vuolemusas šaddet dušše šattut mat gáibidit unnán čuovgga. Vuovdevuođus lea áibmu hui lávttas.

Min guovllu vuvddiin šaddet muorat ovttaid ovttaid ja hui olu ain seamma muorrašlájas. Arvevuvddiin šaddet muorat báldda‑bálddalagaid ja hui máŋga šlája ovtta sajes, ja muorat ja eará šattut leat dávjá oktii šaddan dahje giessasan. Buot šattut vigget beaivečuovgga guvlui ja danne gorkŋot eará muoraid máddagiid mielde bajás.