Luondu ja biras

3.7 - Boazodoallu

Video: Galdu.org. Creative Commons by-nc-sa

Boazodoallu dárbbaša viiddis areálaid. Lea dárbu ahte bohccot besset johttit gaskkal geasse- ja dálveguohtunbáikkiid. Geasset borret bohccot rásiid ja eará šattuid. Dálvet lea jeagil deaŧaleamos biebmu bohccui, muhto borret maid dakŋasiid, rissiid ja rássešattuid. Jeagil šaddá hui njozet ja ii gáibit fávdnát eatnama gokko šaddá. Dat lea heivehuvvon gierdat sihke buollaša, báhka ja goikkádaga, muhto lea rašši go lea goikedálki. Dan dihte lea dárbbašlaš várjalit dálveguohtumiid. Olu vánddardeapmi bievlan ja goikkádahkan sáhttá hehttet jeagelšaddama. Jeagil mollana ja de mannet máŋga jagi ovdal jeagil lea fas ollen dan seamma muddui.

Go čoahkkebáikkit viidánit, biilaluottat ráhkaduvvojit, elfápmodoaimmahagaid huksejit, bartaguovluid ja eará doaimmaid ásahit dakkár guovlluide gos lea boazodoallu, de gáržot areálat maid boazodoallu dárbbaša. Dávjá šaddet vuostálasvuođat boazodoalu ja eará ealáhusaid gaskkas eatnamiid dihte.

Mohtorfievrrut ja eará ođđa teknologiija lea váldon atnui maid boazodoalus. Seammás go dat geahpeda ealáhusa árgabeaivvi, de čuohcá dat lundui. Juohke bievlavuodjin billista eatnama.