Luondu ja biras
Loga eambbo

Passatbiegga

Ekváhtora bokte lea dássedit vuollegisdeatta ja liegga áibmu badjána bajás ja johtá jorggáldatgierdduid guvlui. Áibmu čoasku ja njiedjá vulos loika avádagaid jorggáldatgierdduid bokte. Dakko lea fas alladeatta mii daguha goike dálkki ja unnán arvvi. Áibmu bossu fas ekváhtora guvlui, šaddá passatbiegga. Passatbiegga lea dássedeamos bieggasystema eatnamis ja johtá dan beallái eanaspáppas gos ain lea geassi.

Nubbi bieggasystema mii váikkuha biekkaide eatnamis lea poláraáibmu. Galbma áibmu njiedjá vulos polaid bokte, ja biegga bossu ekváhtora guvlui.

Jaskesavádagat gos biekkat bohtet oktii

Dakko gokko biekkat gávnnadit, ii leat biegga. Ekváhtora bokte gávnnadit passatbiekkat ja dakko lea ge jaskesavádat. Dán jaskesavádagas vulget tropalaš stoarpmat dahje orkánat, ja dakko lea arveáigi, vissis áigi goas arvá olu.

Subtropalaš jaskesavádagat leat fas dakko gokko leat alladeattaavádagat loika avádagain.