Luondu ja biras
Loga eambbo

Álttá-ášši

Govva
Creative Commons by-nc-sa
Govva: Statkraft, Kilde: flickr.
Govva
Creative Commons by-nc-sa
Govva: Statkraft, Kilde: flickr.

Dulvadeamit gáržžidit eatnamiid ja váikkuhit maid lundui go eatnamat biddjojit čázevuollái. Eanemus dovddus lea Álttá-Guovdageaineanu dulvadeapmi. Dulvadeami álgoplánat álggahuvvojedje juo álggus čiežalogi-jagiin.

Jurdda lei álggos buođđut eanu vuolábealde Máze ja bidjat Máze čázevuollái. Galggai šaddat stuora huksen mas Iešjávri maid lei mielde. Ággan buođđumii lei ahte Finnmárkkus lei stuora dárbu elfápmui jus ii galgan bázahallat bargosajiid oktavuođas.

Olbmot Mázes ja eará báikkiin ledje dieđosge áibbas vuostá dakkár plánaide. Eiseválddit vásihedje garra vuostálastima sihke sis geat orro guovllus, boazodolliin, bivdiin, luonddugáhttejeddjiin ja earáin geat beroštit luonddus. Movt dulvadeapmi váikkuha šattuide, luossagođđamii, gazzalottiide ja elliide? Fágaolbmot várrejedje eiseválddit buođđumis eanu go oaivvildedje ahte lei earenoamáš luondu miehtá eatnogátte ja lei deaŧalaš luossajohka. Lei ballu ahte goaskinat ja fállit galge hilgut guovllu ja luosat unnut dahje oalát nohkat. Eiseválddit unnidedje buođđunplánaid ja lohke dulvadeami nu unnin ahte dat ii boahtán váikkuhit namuhan veara. Jus Finnmárkkus galge oažžut čuovgga lámpái, de lei dárbbašlaš čađahit buođđuma, lei sin oaivil.

Álttá-ášši jugii olbmuid guovtti jovkui: sii geat ledje vuostá ja sii geat ledje mielas buođđumii. Šadde oalle stuimmit go buođđunbargu álggahuvvui 1982:is. Muhto dulvadeapmi čađahuvvui ja el-fápmodoaimmahat biddjui johtui 1987:as.

Maŋŋil leat eiseválddit mieđihan ahte ii livčče leamaš dárbu el-fápmodoaimmahahkii. Boasttu meroštallamiid ja dieđuid vuođul dahke sii dan mearrádusa ahte lei dárbu, ja hui jođánit, hukset doaimmahaga.

Álttá-Guovdageainnu dulvadeapmi lea dahkan muhtunlágan áigejuogu: ovdal ja maŋŋil Álttá-ášši. Eiseválddit leat oahppan ahte ii čađahit doaimmaid guldalkeahttá máid guovlluolbmot ja fágaolbmot dadjet.

Loga eambbo Loga eambbo