Skuvla servodatlaš doaimmat leat
A. Ekonomalaš doaimmat:
a) Bargiid buvttiheapmi nu ahte bargiid kvalifikašuvnnat vástidit ealáhusaid ja fitnodagaid gáibádusaid.
b) Olbmuid čuvgehusa lasiheapmi nu ahte buohkain lea doarvái buorit matematihkalaš vuođđodáiddut, njálmmálaš ja girjjálaš gulahallan máhttu, sosiálalaš dáiddut, hutkáivuohta ja gieđadáiddut.
B. Válljendoaimmat:
a) Olbmuid sajáiduhttin servodahkii nu ahte servodaga kvalifikašuvnnalaš dárbbut duhtaduvvojit ja servodaga buot ássanguovllut dássidet ovdánit iešguđetge dárbbuid ja vejolašvuođaid mielde.
b) Servodaga láhtuid sajáiduhttin bargguide ja ealáhusaide ovttaskas olbmo dárbbuid, beroštumiid ja attáldagaid mielde.
c) Olbmuid bajásgeassin servodaga lahttun nu ahte dásseárvu juksojuvvo sohkabeliid gaskkas ja maid olbmuid gaskkas.
C. Kultuvra sirdin:
Servodaga kultuvra sirdin ja ovddideapmi buolvvas bulvii, nu ahte servodaga lahttut ožžot ja váldet alcceset kultuvrralaš árvvuid ja norpmaid. Dalle olbmot ellet iežaset kultuvrralaš oainnuid ja máilmmigova mielde.
Skuvlejumi ulbmilat ráhkaduvvojit dan servodaga diliid mielde, mas skuvllas bajásgessojuvvon olbmot šaddet eallit. Skuvllain addojuvvon čuvgehusa ulbmilin lea veahkehit ovttaskas olbmo ovddidit attáldagaidis ja návccaidis iežas eallima hálddašeami várás. Figgamuššan lea ovttaskas olbmo persovnnalašvuođa ovddideapmi sihke ámmáha ja barggu vuođđodáidduid doarvái buorre máhttin. Skuvlapolitihka kvalitatiivvalaš ovddideapmi dagaha nuppástusaid. Daid nuppástusaid berrešii sáhttit hálddašit, ja dat nuppástusat galggašedje ollašuhttit servodatdili, masa lea dihtomielalaš figgamuš.
Dábálaččat servodagas lea stuorát skuvlendárbu go maid árvvoštallamiid mielde lea dieđus. Dan dihte skuvlejumi plánain ferte ráhkadit vejolašvuođaid maid dakkár intellektuála doaimmaide, mat eai vel dálá servodagas leat ollege. Plánemis galgá beassat áiggi rájáid badjel ja addit vejolašvuođaid boahttevašvuođa diehtagiid ja dieđuid heiveheapmái. Plánemis galgá ráhkkanit boahttevašvuođa skuvlejumi dárbbuide. Skuvlejupmi galggašii ovddidit ja ođasmahttit servodaga huksehusa sihke ovddidit ovttaskas olbmo návccaid váldit vuhtii boahttevašvuođa ja gierdat váttis diliid. Skuvlejumin olmmoš gierdá buorebut eahpesihkkarvuođa ja doaráskan diliid. Skuvlenproseassa galgá ovddiduvvot dan dássái, man servodaga dárbbut gáibidit ja masa oahppanpsykologiija ja pedagogalaš diehtu addet vejolašvuođaid.