1.9 - Skuvlla váldodoaimmat ovttaskas olbmo ektui

Skuvlla váldodoaimmaid ovttaskas olbmo ektui sáhttá oanehaččat ná dadjat:

• Bajásgeassit mánáid ja nuoraid servodaga dohkálaš lahttun. Servodagain oaivvilduvvo sihke lagašservodat ja riikaservodat.

• Kultuvrra sirdit nuorat buolvvaide. Kulturdoaba sisttisdoallá sihke báikkálaš-, váldo- ja riikakultuvrra.

- Vuođđomáhtuid, -dieđuid ja –doaladumiid (-guottuid) oahpahit.

- Ovddidit olbmo indiviida persovnnalašvuođa

Ruoŧŧilaš dutki, Lena Johansson (1983), lea gávnnahan ahte skuvllas leat golbma servodatlaš guovddášdoaimma

1) Ovttaskas olbmo skuvlendárbbuid duhtadeapmi (individorienterade målsättningar),

2) servodaga doaimmaid ollašuhttin (samhällsanpassande målsättningar) ja

3) servodaga ovddideapmi ođđa ja buoret dillái (samhälls-förändrande målsättningar).

(Utbildningsdepartement 1983.)

Dain vuosttaš guovddášdoaibma, ovttaskas olbmo skuvlendárbbuid duhtadeapmi, sisttisdoallá:

• ovttaskas olbmo ovdánanvejolašvuođaid ollašuhttimis su attáldagaid mielde,
• oahppováldima válljenvejolašvuođaid lasiheami,
• ámmátlaš válljenvejolašvuođaid lasiheami,
• lassioahppu váldima vejolašvuođaid lasiheami,
• kultuvrra ávkin atnima ja buorrin geavaheami ovddideami,
• kreatiivvalaš doaibmama ovddideami ja
• movttiidahtti aktiivvalaččat oassálastit servodatdoaimmaide

Daid vuođul oaidnit ahte servodatlaš ja ovttaskas olbmo skuvlendárbbut leat seammasullasaččat eaige eisege vuostálaga dahje ruossalassii.