1.1 - Skuvla servodaga bajásgeassininstitušuvdnan

Stáhtat leat ásahan skuvllaid álbmoga čuvgehusdási loktema várás. Stáhtaid eiseválddiin lea figgamuššan, lea áhte buot riika dahje stáhta olbmot galget oahppat ja máhttit dihto vuođđoáššiid, vai sii birgejit servodagas, vai sin eallindássi loktana ja vai sii šaddet servodaga lahttun. Dakkár vuođđomáhtut leat omd. lohkan, čállin ja rehkenastin. Servodagas lea dohkkehuvvon oaidnu man vuođul bajásgeassis lea vuoigatvuohta váikkuhit ovttaskas olbmo ovdáneapmái ja figgat su ovddidit ulbmiliid ja juksanmeriid guvlui. Go stáhta lea ásahan skuvlaortnega, de dan doaimmaid várás lea ráhkaduvvon lágat, mearrádusat ja njuolggadusat. Dát lea hálddahuslaš barggu ja ollašuhttindoaimmaid várás. Dan lassin lea alimus politihkalaš dásis šiehtaduvvon skuvlema ja skuvlaortnega prinsihpat. Dáid prinsihpaid gohčodat riika oahpahus- ja skuvlapolitihkkan. Dábálaččat daid bidjá riika ráđđehus dahje hálddahus. Ovtto go ráđđehus ásahuvvo, de dalle maid sii čállet ráđđehusa prográmmii oahpahus- ja skuvlapolitihkalaš áššiid. Dát leat áššit maid dát ráđđehus boahtá doaimmainis deattuhit.

Juohke Davviriikkas lea namuhuvvon ministeriija dahje departemeanta, masa gullet riika oahpahus- ja skuvlaáššit. Ministeriija dahje departemeantta lassin lea dábálaččat organiserejuvvon ásahus gos alimus virgeolbmot ja eiseválddit meannudit riika oahpahus- ja skuvlaáššiid. Guovllu dásis leanaide dahje fylkkaide gullet dikšut ja bearráigeahččat oahpahus- ja skuvlaáššiid. Ieš skuvladoaimma lágideapmi lea dábálaččat bidjon gielddaid dahje suohkaniid ovddasvástádussan.